雖然好多人都覺得，中央唔like特首有政黨背景，偏偏自由黨主席田少就要同中方拗頸，話民意都覺得特首唔一定要退黨，所以田少決定再向虎山行，向立法會就特首選舉修訂條例提咗修訂，八方都希望田少唔會因為呢樣嘢同中央又鬧翻啦。
呢頭田少曳曳，嗰頭就到達仔作反。事關達仔又跟風，喺復活節假前就特首選舉提咗修訂，而且仲提咗兩個㖭，實行要多過田少咁話。係邊兩樣嘢？第一樣同田少一樣，都係覺得特首可以有政黨背景，另一樣呢，就係希望設有提名上限，即係唔可以霸晒啲提名票，達仔話唔知有冇同田少重複㗎，總之就提咗先，咪等范太發落囉。
八方聽聞有中方人士預計，田少個修訂喺分組點票下，有可能僅僅過關，到時真係唔知點算好，皆因中央唔想香港有個執政黨，所以𠵱家最關鍵嘅，就係睇范太點樣裁決。
嗱嗱嗱，范太一向咁錫身，呢鋪都一定唔例外，八方真係唔知最後佢會點做，唯一知道嘅係，佢一定唔會激嬲中央，換言之……答案都好呼之欲出喇啩。
傳真︰2623-9278
電郵︰[email protected]