難得復活節有幾日公眾假期，走去書報攤買番本日本汽車雜誌，八卦吓呢個東瀛車壇有甚麼新料；翻開今期4月26日號的《BestCar》，發現到頭版有大篇幅講在高油價刺激下，唔少歐美同亞洲用家意識到慳油的重要性，所以豐田廠方正積極準備在2008年初，推出第3代新Prius；除賣相留有現行車款的影子外，筆者睇落呢部預想中的Prius，就更加酷似一部掀背型轎跑車，兼且造型更符合氣流動力學的要求，Cd值低至0.26而已。新Prius樣靚不在話下，我最驚歎重係呢部未來慳油王，用上新3代THSIII混燃引擎，耗油量較現時平均35.5km/L更進一步，每一公升油可行走高達40km咁多，可省卻多12-13%油量之餘，新車0-100km加速度仲厲害，可以做到9.9秒內，真係快到不得了。
凌志LS460慳油過平治S500
三菱部i新車系，雖然重未有正式抵港，但外界反應卻好評如潮，除有傳新車底盤、傳動同引擎跟新一代Smart共用，三菱廠方原來更有計劃在i的基礎上，再研發一系列新車種，既有三門Coupe又有KCar版的SUV車呢！預期新車在2008年間陸續登場。繼早前有傳凌志會推出全新GS450h之後，今期BestCar重披露出今年9月20日，廠方會以全新凌志LS460抗衡平治S500咁話，雖然用開Benz班客無乜可能會降格改用凌志車，但難得佢哋咁有誠意，聽講話呢部LS460新車，用上一台4.6公升V8引擎（馬力380匹），最高時速達250km/h外，0-100公里加速亦只係5.7秒，除座艙會大幅度擴闊之外，部新車另一個賣點會係佢的耗油量比S500（6.7km/L）還低，只有9.5km/L，好合乎慳油的要求。
記者：陳偉林
