馬主H趁復活節假期未到之前，前星期五去咗關島休息，在沙灘上享受陽光與清新空氣，一連三日見到藍天白雲，心境都輕鬆啲。去到關島，不忘投注賽馬，上機前帶埋本馬經，打電話投注，居然「隔洋買馬」，心水更清，贏咗幾千蚊，可惜買一口三寶，一百蚊一注，皇仁飛駒、財到得勝，射落去尾場富士晨曦，因時差關係（關島快兩個鐘頭），馬主H在酒店內仄互聯網，知道皇仁飛駒、財到得勝分別勝出，賠率有八倍乘八倍，嘩，如果富士晨曦贏埋，呢口一百蚊三寶有成萬四五銀，機票加酒店費用都攞番晒嚟啦。點知富士晨曦大熱倒灶，唐英年冇糖派，馬主H空歡喜一場。
馬主H買「皇仁飛駒」，唔要同場嗰隻「夢寐以求」，主要係捧老友場啫，唔係眼光獨到。「皇仁飛駒」馬主H係皇仁舊生團體，內有一位牙醫梁先生，就係滙豐女強人梁太嘅先生，與左丁山相識多年，故此捧場。但係點解「夢寐以求」係大熱門，竟然跑第尾？
返香港之夜，馬主H在機上見到關島全景，非常清楚，晚上到達香港上空，自窗口望出去，一片灰黑，乜都睇唔見，啲又灰又黑嘅雲層，籠罩香港上空，能見度甚低，枉費咗香港夜景。馬主H不禁嘆一口氣，「返到香港，重歸污染，又要呼吸懸浮粒子咯。」
次日睇《南華早報》，唉吔，告東尼大發牢騷，繼「天行者」之後，「夢寐以求」被驗出氣管有痰兼有血，陣上根本跑唔出水準，故此包尾而回。告東尼投訴話香港空氣污染，馬匹領嘢，防不勝防，要求馬會准練馬師畀馬匹服藥，預防氣管/肺部有痰。前冠軍練馬師愛倫支持告東尼，話有道理。
呢，左丁山喺四月三日先至講及空氣污染影響賽馬，估唔到四月八日就發生「夢寐以求」大敗事件。左丁山雖然中咗「皇仁飛駒」，但咁樣贏法，都唔多高興，捧大熱門嘅老友，當然更谷氣。