湊仔如打仗，特別是對初為人母的媽咪來說，每次帶BB出街，執其用品亦有如入戰場前執裝備一樣……咁緊張，幾多個奶樽先夠呢？執少條尿片又驚唔夠換，帶得多又怕重，帶得少又驚唔夠用，一條條問題在腦內轉個不停。若然你亦有以上問題，咁不如聽聽過來人的意見，睇吓啱唔啱使！
記者：黃婉冰 攝影：林栢鈞、黃子偉 Model：Irene
BB出街一日9大裝備：
1.6條尿片密密換
「因為BB出世頭12日未識控制肛門，所以排泄次數會比較密，呢段時期最好帶多少少尿片，約5-6片左右。」
2.1包濕紙巾抹patpat
「BB專用濕紙巾係用嚟換片抹patpat用，每次會用4-5張，所以最好帶一包，一般都會有埋lotion成份，所以，可以唔使帶凡士林都OK。」
3.2個奶嘴唔怕跌
「記得帶多一個奶嘴，萬一啜啜吓跌咗，都可以有多一個做『士啤』，仲有奶嘴鏈，咁就更加穩陣。」
4.1個水壺裝熱水
「最好買一個500ml保暖壺，每次出街前裝滿熱水，用嚟沖奶用，咁就唔怕要周圍搵熱水開奶。」
5.1個細樽裝清水
「BB飲完奶一定要飲水，所以記得要帶多個細奶樽，用嚟畀佢哋飲水用。」
6.1張包被防冷親
「初生BB要確保體溫保持在37.5℃，所以帶出街一定要用包被將佢包到實，瞓覺又可以當被冚，所以包被一定要有一張。」
7.3個奶樽開餐用
「飲奶粉就要4個鐘飲一次，帶定3個就夠，但如果飲人奶就要2-3個鐘飲一次，咁就要帶4-5個。」
8.3格奶粉食三餐
「每格最多可以裝8安士，將每一次飲奶嘅份量裝入一格，每格裝幾多視乎BB食奶份量而定，好似初生咁，每格裝4-5安士，帶3格就夠。」
9.4條紗巾抹嘴
「BB食奶一定要幫佢哋攝一條，用嚟抹嘴用，一餐用一條，最好帶定多一條，萬一嘔奶都可以有得抹。」
媽咪專用手提袋間隔多
特別設計畀媽咪用的手提袋，內內外外間隔特別多，可以載大大小小不同的BB用品，一袋過帶出街，方便存取。
第一次做人媽咪當然緊張，特別是每次帶BB出街，單是要執齊BB的各樣行裝，新手的話，隨時可能要花上1個鐘，一個唔覺意帶漏一樣就麻煩！就好似過來人Kathy，當初同樣錯漏百出，單是執漏「貨」都試過兩次。「第一次做媽咪，第一次執BB袋出街好緊張㗎，成日驚執漏嘢，以前出一次街check幾次袋，但係有陣時，當你聽到個BB喊你又會好緊張，咁就好易執漏，我就試過有一次帶個女落街飲茶，急起上嚟帶咗奶粉唔記得帶奶樽，好彩嗰次就喺屋企附近，咪即刻返屋企攞囉。又試過有一次出尖沙嘴，點知嗰次記得帶奶樽唔記得帶奶粉，後尾咪嗱嗱臨走去超級市場買，個女先有奶食。」
後來Kathy想出一個辦法，「為免再執漏，列咗一張清單，特登貼喺門口，每次出門口之前再對住張清單點數，點齊先出門口，咁就唔怕會執漏嘢。」
執行裝要睇季節
基本上，執個BB袋就好似執藥咁執，只要將最基本的用品帶齊就OK。但記住喎，有某些用品是要視乎季節而定，好似BB用的包被，夏天就要揀張較薄身，質料同樣要以全棉為主，好似毛巾、紗巾質料就最好。到冬天，就要揀張厚身，最好是全棉質料加一層薄棉，保暖度較高。
視乎情形再加執
除以上最基本的用品外，媽咪亦需要因應BB的特別需要而另外帶其他用品作不時之需。如果BB經常嘔奶，咁就最好多帶一套衫仔，萬一BB嘔濕衫仔都有衫換。有些BB會因為脷胎厚而影響食慾，所以媽咪就需要帶些脫脂棉，用熱水浸濕，在餵BB食奶幫BB抹舌頭。
售賣點
（a）嬰兒童裝特賣場：尖沙嘴加連威老道20號同順興商業中心8樓803室（29504110）
（b）吉之島：鰂魚涌康怡廣場南座地下（28846888）
（c）各大超級市場