復活節假期，進士今期講吓笑話。男子漢近來成日都成為焦點，就搵佢哋嚟笑吓，化一化戾氣。
星期六同當差老死踢波，踢完之後喺附近坐低吹吓水。原本想八吓魔警睇吓有冇內幕料，老友笑吓話內部都好多人想知內情，佢就唔知嘞！不過講開佢當差多年嘅趣事，就有一單關於西環浮屍嘅。
海陸警察齊出招
話說老友多年前曾於深宵交更前（一般俗稱夜尾）收到一單關於浮屍嘅報告。由於臨近收工，冇乜伙記想接。由於警隊內部有指引，遇有浮屍案，離岸三米以內屬陸上警察嘅jurisdiction（管轄權），三米以外屬水警。去到現場之後，有已退休老差骨就教老友喺附近搵把掃把，喺岸邊猛划，希望將條鹹魚推出三米外，幾經搞作，終於成功，就拿拿聲call水警。水警兄弟到場之後睇咗環境心知被搵笨，有人亦心生妙計，二話不說就掉頭開「行」車葉將條鹹魚打番埋岸。最終老友亦自知唔啱，OT做埋單case。
今時今日諗番起都覺得對死者不敬，不過老友當年年少無知，亦難怪有咁嘅事。平心而論，警隊嘅質素亦不斷改善。
伙記們揀一份咁嘅工都知道當中嘅危險性，有啲冇良知嘅市民仲成日話佢哋貪薪高糧準。我只有一句，我所認識嘅警務人員大部份奉公守法，大家喜歡聽古仔冇所謂，唔好將所有伙記都label成「好仔唔當差」。我喺度亦希望因公受傷嘅各位伙記早日康復，各位家屬內心平安。復活節快樂。
傳真︰2623-9278
電郵︰[email protected]