旅發局呢期頻頻俾人揭出大花筒事件，難得總幹事臧明華好有勇氣，冒住俾人插嘅勇氣上商台接受訪問，好彩平時鬧人多過讚人嘅主持人李慧玲口下留情，只係問佢啲軟性嘢，令臧明華避過一劫，唔使俾人問到口啞啞。
祖籍山東嘅臧明華一向好少講屋企嘅嘢，噚日佢話自己有成十一個兄弟姊妹，自己排第十，對落只有一個細佬，既然係孻女，梗係俾屋企錫到燶，到𠵱家媽媽見佢工作唔如意時，都煮啲佢鍾意食嘅嘢畀佢，好唔話得。
臧明華個老公姓鄧，從事電子零件行業，而且有個成十三歲大嘅囝囝。臧明華對兩父子讚不絕口，先讚小鄧從來唔使媽媽操心，大鄧就係讀勻所有書嘅書蟲，最終仲爆咗句我係世上最幸福嘅人。唔知如果佢要同普羅打工仔一樣，要減人工而唔係逆市加薪時，臧明華仲會唔會覺得自己好幸福呢？
傳真︰2623-9278
電郵︰[email protected]