自從小小超李澤楷搵咗蘇澤光入電盈後，佢喺公司嘅時間就愈嚟愈少，有時連公司發布業績、股東大會都好少露面，搞到啲小股東想問佢嘢都好難。
不過，八方知佢一向好鍾意同青少年接觸，佢講過早年曾為邊緣青少年補習，又去探夜青；之前協青社搞嗰個籌款音樂晚會，小小超除咗出席活動外亦係最大嘅捐款人。噚日佢仲出席喺上海舉行嘅兩岸四地「龍耀浦江」青年大型交流活動，作為論壇嘉賓。睇吓啲學生爭住同佢影相就知佢有幾受歡迎，嗱各位電盈股東，若果下次佢又唔出席股東大會，知道喺邊度搵人啦。
講番呢嗰活動，香港青年協會同中華全國青年聯合會自○○年開始合辦多項嘅「中華龍騰」系列活動，包括○○年二月喺北京長城舉行嘅「龍舞長城」；○二年七月喺香港舉行嘅「龍聲飛揚」萬人青年音樂會。今年則選喺上海舉行，來自內地、香港、澳門、台灣四地約三千名青年人參與相關活動。除咗小小超外，嘉賓仲包括香港立法會主席范徐麗泰、上海市長韓正、香港上海滙豐銀行執行董事王冬勝及瑞安集團主席羅康瑞等。
傳真︰2623-9278
電郵︰[email protected]