喺本地車壇佢並唔係咩名人，但對於汽車界的傳媒朋友嚟講，就肯定個個都知佢係邊個，點解？事關佢就係投身車行十多年、曾任職超過6間汽車代理商、而且係本地MX-5會的創會人之一嘅GaryLai。咁究竟佢點解咁鍾意車？而佢自己又擁有咩座駕呢？不如就等今日由佢親口講吓喇！
記者：陳偉林 攝影：楊錦文
DreamCar係林寶 卻擁MX-5同Sera
望落仲後生過我嘅Gary，從事汽車行業的時間比我還要長，佢曾於大發、日產和本田負責Marketing，除兩度任職富豪代理外，最令人羨慕還是現職林寶堅尼、愛快及蓮花等SuperCar品牌代理。平日駕駛唔少SuperCar嘅Gary好坦白咁話，佢有錢一定會買部林寶堅尼做座駕，事關呢一代新車無論包裝、性能同獨特性都好出眾，周不時駕駛呢類車喺街行，會引來不少艷羨目光外，偶爾快跑一回的爆炸力，有說不出的快感。Gary至今所擁有的座駕，卻是列入古董車一類的第一代萬事得MX-5和豐田Sera；前者佢認為部車好有古典味，後者佢覺得同級車中好難再找到鷗翼式的車門設計。
夾紙條搞MX-5車會
兩部車也曾帶給Gary不少難忘往事，當中最令佢印象深刻，原來係本地汽車Club未盛行，只有SuperCar會、老爺車會、甲蟲車會同Mini會；Gary當年就同幾位志同道合的MX-5車主，每在街上看到其他MX-5車時，便會將聯絡的紙條夾在擋風玻璃上，久而久之便聚集到近乎40部MX-5，還在1996年的2月11日創立MX-5車主會！唔單止引起汽車代理商的關注，日後亦激勵到唔少車主自立車會組織。從Gary口中可知佢至今仍對汽車有幾鍾愛之餘，佢還計劃從日本多購一輛豐田Porte做收藏㖭！