今日講吓「殼王」陳國強，大家唔好誤會睇咗娛樂版，八方亦唔識寫葉小姐同郭小姐嘅新聞，只係九鐵地鐵合併，又見到新任九鐵行政總裁詹伯樂出現，所以諗起陳老闆。
話說陳老闆旗下有間上市公司叫保華建業，編號577，以前叫天網；呢間公司喺個半月前，個主席仍然係詹伯樂，記得在三月初，佢哋有個董事總經理起身，詹伯樂仲出嚟見記者，大派定心丸，話公司會成立管治委員會，唔會因為一個高層辭職而受影響，點知十日之後佢都辭埋職，點解離開陳老闆？當然係因為煲呔啦！
詹伯樂九一年做工務司，退休後自己開顧問公司，九七年加入九鐵幫楊啟彥手搞西鐵，點知整單西門子事件，累到兩人都要黯然而去，楊啟彥退休，佢就輾轉去咗幫殼王手。
掂過西九嘅都升職
世事真奇，點都估唔到今時今日，政府會搵番個七十二歲嘅老外去收拾九鐵殘局。咁殼王連損兩員猛將，會唔會冇人用呢？大家唔使擔心，呢個世界，有錢又點會冇人呢，嗱，有夫人在權力核心嘅周明權，都幫緊殼王另一間公司做主席啦。八方仲收到料，有一位剛剛退下火線嘅高官（職位唔低過老詹㗎），好快就會去佢度幫手，邊個？大家估吓，貼士係同北京關係好好嘅。
講開北京，煲呔卒之搵到個曹萬泰上去頂住駐京辦，雖然個位降到得返D6級，但泰公都係有得升職。八方以前同泰公食飯時，佢仲喺度推銷西九，估唔到西九一散檔，唔單止唔使孭鑊，仲有得加官晉爵。
其實唔止泰公，個個同西九有關嘅都有得升職，好似煲呔就變咗特首，搞過西九嘅區璟智，就升咗做旅遊事務專員，西九睇嚟真係一塊旺地，𠵱家搞緊西九嘅係肥龍，再升職就冇乜可能喇，不過睇怕未來點都有運行！
傳真︰2623-9278
電郵︰[email protected]