女子組合Krusty成員之一的活己嵐，有一個比她細四年的妹妹，不過幼時阿嵐覺得父母偏心妹妹，故經常欺負她。有一次阿嵐兜巴摑妹妹，結果被父親揮拳懲罰。
活己嵐小時候可算是一個大醋埕，妹妹出世後感到自己遭父母忽略，更覺得父親十分偏心，所以不太喜歡妹妹，很多時都會找機會作弄她。
扮錫妹妹
年紀小小的阿嵐平時裝作一副疼愛妹妹的模樣，其實私底下只想找機會搞喊她，阿嵐說：「我喺媽咪面前會扮到好錫個妹，但係當阿媽行開咗，我就會即時搵機會搣佢塊面、整喊佢，阿妹一喊我就會即時扮到好緊張同阿媽講，咁就冇人知係我整喊佢啦！」
阿嵐表示父親十分偏心妹妹，她記得有一次二人打架，由於她錯手打到妹妹的耳朵，被父親懲罰，她說：「嗰陣我同阿妹打交嘅招數都係離唔開扯頭髮，點知有次我一巴摑咗落佢隻耳仔度，阿爸見到居然一拳打埋嚟我度。」
軍訓童年
此外，在阿嵐的記憶中母親管教十分嚴厲，她每日的生活模式都要依照時間表進行，更形容小時候的生活有如在軍校般，她說：「每日放學之後就要做功課，瞓完覺就要溫書同練琴，玩嘅時間只係得好少。」
過着軍訓式的生活，阿嵐成績十分優異，直至升到小六，父母離異，她的生活才轉變，她說：「父母離婚之後，我同阿妹就跟住阿爸，嗰時可以話係一個大轉變，我由零自由度變到好自由，自己鍾意做乜就做乜。」
採訪：李珮洳 部份圖片提供：活己嵐
