每年至少一度嘅《WinningEleven》早已成為球迷甚至機迷其中一款必玩作品，佢做得幾似真係踢緊波、聯賽模式有幾正相信唔使我講大家都應該好清楚。適逢今年係世界盃年，仲記得六代又係食正決賽周開始前個幾月出嚟搶錢，今次十代小記有幸親身率先玩過，發現比上集落多咗心機體貼玩家真正需要，如果唔快啲操Fit技術咁點同其他人爭做世紀波王呀？
文：陳福榮
如果閣下玩過《WE9》，肯定畀今集嗰種速度感吸引住，事關佢同之前唱反調將引以自豪嘅細緻動作Cut走，操控顯得流暢好多，大幅提高比賽精采程度。新增嘅「簡單設定」亦係今作特色，至啱懶得將逐個項目去Set嘅人，幫你諗埋幾時換人同換邊個出場，唔想多費神嘅玩家亦可有不俗陣容。
至於大家關心嘅球員能力，巴塞兼巴西主將朗拿甸奴幾近神級，原已「見紅」嘅八項能力進一步增加，敏捷性和盤球精度均得到99點極限！細哨攞住個波，你想喺佢腳上搶到都幾難。反而碧咸同朗拿度就跌Watt得幾緊要，萬人迷長傳精度得番98，大哨各項能力更減到見到8字，幾反映真實中嘅表現。
官方比賽開鑼
與其畀其他團體搞啲不三不四嘅比賽，雷霆881商業一台睇準呢次機會拍埋SONY、Konami、時代廣場、海港城、荷里活廣場同我哋蘋果日報，舉辦名為「雷霆881WinningEleven世界波」嘅官方比賽，獎品極之豐富。冠亞軍都可獲得大型液晶電視一部。而喺剛過去嘅星期六日，海港城SportX就已經踢完第一輪分組賽，想取得餘下出線名額嘅朋友，就不妨留意電台廣播或者瀏覽881903.com網頁了解參賽方法。
重視護球犯規激減
只要同電腦踢過一兩場波，就不難發現佢用波會用得好足，比起過往有更多回傳及短傳，兼且盤球時會有大量Cup波動作，除非係正面衝突否則防守嗰邊都幾難搶到波。而且當一名護球能力較高嘅球員持球，咁人哋響佢背後只能強行鏟球犯規，事關球員每每都枒起雙臂阻止其他人埋身，尤其係細哨十居其九都會用個背脊得實晒。提起犯規問題，基本上今集係唔會發生不必要嘅犯規，感覺上就連越位都發生少咗，呢點亦都係間接增加咗比賽流暢度。
比起前幾集，今集追加咗幾支拎到球衣同會徽版權嘅國家隊，包括有阿根廷、意大利、英格蘭、荷蘭及西班牙，喜歡呢幾隊波嘅玩家就一定要親身使用喇。
ML新設防作弊功能
由《WE4》起MasterLeague已成為系列不可或缺嘅遊戲模式，而今集ML跟以前都係大同小異，重大分野係一來可以設定球員唔會成長，Hold死一個數值無用擔心老咗又要放走佢咁麻煩。二來就係真正能挑戰技術嘅防止作弊功能，只要喺比賽進行期間熄機，咁嘅話就算畀你Load番個Data都會當你輸0:3，冇得借「SaveLoad大法」出術搞到場場贏晒。順帶一提，收到風《WE10》仲會喺其他平台推出，NDS同PSP版分別喺6月底及11月面世，街機版大約10月就會登陸香港，至於全面對應網絡對戰嘅XB360版本則要等到11月尾至有得玩。
遊戲類型：SPT
對應機種：PS2
遊玩人數：1至8人
開發商：KONAMI
發售日：4月27日
售價：約$418
