長城科技（074）1年嚟未升過，現水位簡直賣大包，要搞。長科去年6月底止NAV2.86港元（下同），現價（1.77元）相對折讓38%，科技股仲有折讓，少有。但點止咁簡單？
長城主要資產，包括長城開發（深：000021）及長城電腦（深：000066）兩隻深圳掛牌A股。就算以股改後權益計，長科應佔兩隻A股市值仲高達59億銀，減去長科應佔賬面資產值（成本）約21億銀，凸章38億銀。計計數，代表長科每股隱藏資產值高達3.17元，實際NAV係6蚊，折讓70%，吸引到痹！再講，呢兩隻A股過去4、5個月累積升幅講緊25%同50%，股改有着落，股價繼續狂升時，阿媽長科副身家，繼續大暴漲。長科現價就算翻一番到3.55元，仍較實際NAV折讓41%，要足額反映隱藏資產值，長科要見4.95元，亦代表現價潛在升幅1.8倍，極之抵博。
第一上海博見1字頭
第一上海（227）去年底以超過15倍高PE出售好孩子業務，連埋本身手頭銀彈，揸住嘅淨現金應該超過6億銀，等於現價（0.72元）高達75%比重，現金底厚。
又中資股炒到飛起，第一上海唔止食住中資熱，旗下證券業肯定肥仔水。對上星期四，另一隻中資孖寶申銀萬國（218），已經㩒唔住狂升14%，第一上海只係升4%，要炒，揀第一上海。博第一上海見1字頭，潛在回報率近40%，仲未去到NAV1.2元位。
錢雋