左丁山平時寫一啲行業嘅真實情況，並無嚇親人嘅企圖，因此星期三《蘋果》「隔牆有耳」版刊登咗一篇會計師文稿，指左丁山「嚇親人」，自己睇到，幾乎嚇親，要澄清一下。大學畢業生初入會計師行，確係做得好辛苦嘅，每日工作十二小時，唔算苛求，如果忍得，捱捱捱足十年，重未burnout嘅話，收入與升級嘅前景梗係幾妥當啦。講出實況，唔算嚇親人，香港中學理科班啲叻仔叻女，鍾意讀商科、會計、醫生、法律，將來亦須要鍾意埋長時間工作捱通宵至得。
寫完一篇小學教師T被炒魷之事，唔知會唔會嚇親人，一位已經被教育學院取錄，專攻小學教學嘅學生來電郵話，睇完四月十日嘅「GG細語」，有啲驚驚哋喎，恐怕畢業後唔知道難唔難搵工，或者碰上同一類校長。呢位讀者（署名……五一四）唔使驚，去年與今年嘅出生率回升，你四年後畢業，小學殺校情況應該成為歷史，啲校長定一定，消除殺校恐懼後，對老師唔會施加好大嘅壓力，搵工、做事，都會容易啲。
一位讀者徐問番○五年七月二十九日講「澳洲襪」之事，左丁山嘅悉尼老友記已經代買兩對襪，所以唔明白點解讀者徐買唔到，至於詳細資料，手頭冇，恕難答覆。讀者徐又問俗語「狼過華秀隻狗」，華秀是誰人？問得好，令左丁山記起十四年前榮智健控告《壹週刊》誹謗一案，起因就係「狼過華秀隻狗」呢句俗語，單官司打咗兩堂之後，庭外和解。當時就引起誰是「華秀」嘅討論。究竟誰是華秀，並無定論，如有資格老，對廣東俗語有研究嘅讀者，請賜教。據講呢句俗語源起於廣州西關，真正來由，唔見有人考證過。
另一位讀者問及四月九日本欄提及嘅裁縫店，究竟在哪裏。好易啫，置地廣場上自歷山大廈（近東亞銀行嗰邊）行人天橋行過去就係東亞銀行大廈，行多十幾呎就見到裁縫店。