那天我們在中環ABathingApe的開幕派對，打雀咁眼望住Nigo氏那些可以用「一抽抽」來形容的鑽石頸鏈blinkblink駕到，忽然有探子回報：「嘩！我查到啦！Nigo頸上面嗰抽嘢值一百萬㗎……每條！」
「鑲鑽石咩？」是香港人遇到懶矜貴懶馨香的人與物時，最例牌的刻薄。原來真的拿着一百萬港幣去鑲鑽石，據Nigo先生真人示範，只不過得個餅咁大，漢堡包尺碼，仲係碎鑽咋，你咪以為好襟使！公益金似乎要替每年的大型步行籌款改改名，否則受惠機構都好值得擔心。
我多口問句當時在場的朋友：「如果你有呢筆可以亂使嘅錢，你情願一百萬買一條鏈，定一百萬買一架車？」
Whowantstobeamillionaire？
車車車車車，竟然全部揀車，諗都唔使諗，奇就奇在這班人大部份是香港HiFashion界的買手，這種「看破」似乎有點玄機。只得我這局外人還舉棋不定，其實我想揀鏈，但係咁嘅環境，還好意思講嗎？
問題本來可以變成這樣的：「一百萬，你情願買件衫定買層樓？」但幻想自己會買一百萬一件衫的人，是不會肯住一百萬買得起的樓的，這個我明白，所以沒問。
我其實最想着一次一百萬一件的HauteCouture。
看過林燕妮小姐的訪問，她說八十年代在Joyce買過一件一百一十多萬的皮草，我固然想知道一球嘢着上身的感覺，但更想知道嗰件「價值連城」家陣去咗邊？
作為時裝精，如果注定有一百萬冤枉錢可使，都想親手打造購物史上的personalhigh，同樣一筆錢，用來在維港上空放煙花十五分鐘都不夠呀，更重要的是，就算曇花一現，最好還是「現」在自己身上吧。
着去邊？
幾星期前香港ChanelHauteCoutureShow的官方發表會，一套高級訂做服入場價二十萬，頂級的可達二百萬或更高，我覺得揀二十萬的有點委屈，等於去半島酒店Gaddi's只能嗌熱狗，去到盡的二百萬假如又嫌太暴發，人一世物一世也許中庸的一百萬正好。
專誠飛巴黎傾構思度尺寸連試身，起碼要來回三四次吧，就算不講錢，時間精神都是項大投資，千辛萬苦想個值得的場合去才最難。
公司周年晚宴？去飲？落Volar？影全家福？還是一如你衣櫃中大部份靚衫的命運，半夜着住喺屋企照吓鏡，然後除番？
婚禮比較值得，但收視率還是有限，想值回票價的話，應該揀下次民主大遊行時着。
又或者開演唱會時着，如果你有演唱會開的話。
最後一個方法，選特首，然後求神拜佛自己勝出。
着完點？
香港博物館不肯收的話，可以考慮央求太空館，再唔係的話可試試茶具文物博物館，李鄭屋古墓……米蘭站和ebay你想都不要想。
除非你是徐小鳳，則可轉贈盧海鵬。
事實上多年前我確實問過小鳳姐，又貴又阻碇又易爛的晚禮服着完點處置，她說家中客廳要撥出一半面積無端端起個地台，為了提供暗格收藏她的「HauteCouture」。
有沒有去過些人家屋企，奇奇怪怪地在客廳牆上掛件和服或清朝官袍扮藝術品，我覺得好鬼片feel，就算是一百萬的高級訂做服都不能例外。
唯一方法，當它一百萬一架車一層樓或一條鏈，日日用，連續着到十年的話，每日平均二百七十三個九毫七，抵啲囉！
最後，你哋究竟想唔想知道一百萬一件衫到底着起有乜嘢感覺？請保佑我的寫作及填詞事業一帆風順，仲要係唔知點解上到市嗰隻喎，到時，我一定話你聽。
黃偉文自我簡介：填詞人，其實最鍾意買嘢，最憎寫字，星期日盡可能唔寫字，去買嘢。
Textby黃偉文
