鄧小平同趙紫陽有乜共通點？除咗都係國家前領導人之外，原來……佢哋兩個都鍾意食朱古力㗎！呢樣嘢係做咗甜品師傅半世紀嘅「明星餅王」黃錦興師傅（圖）噚日話畀八方知嘅。
興叔今年六十六歲，十六歲入行做學徒，努力之下兩三年就升做餅師，先後做過半島酒店、文華酒店、澳門嘅凱悅酒店，又去過北京長城酒店、南京晶山花園酒店做總餅師，當年鄧小平同趙紫陽都食過興叔整嘅糕點。鄧小平鍾意朱古力慕斯同瑞士蘋果撻，而趙紫陽就喜歡加入薄荷酒嘅朱古力truffle，興叔話，趙紫陽女兒王雁南都不時會帶啲朱古力孝敬老父㗎。
佢又曾經為賭王何鴻燊整過生日蛋糕，雖然賭王家族咁多人，但個蛋糕都只係十磅八磅。現時全港五星級酒店過半數餅師都係興叔徒弟，雖然佢已經冇喺酒店做，不過就有開班授徒，地址喺灣仔，有興趣學嘅不妨留意吓。
爆料熱線：29290000、27860099
報料傳真：26239278
報料電郵：[email protected]