智叔生活簡單，閒來喜與長子及二子到球場踢波，因兒子喜歡默劇，他又不辭勞苦往學戲。智叔說：「有藝術成份，娛樂性又高，個仔又鍾意，何樂而不為呢？我哋一家人冇乜嘢特別嗜好，物質要求又低，好容易就過到生活。」正因如此，令智叔決定離開無綫電視台時少了一層顧慮。
老人牌攞兩個
二十七年前，年僅二十六歲的廖啓智加入第八屆無綫藝員訓練班後，便一直在無綫工作，論年資的金牌他拿了兩個，智叔笑言：「喺TVB每做滿十年會頒一個金牌（俗稱老人牌）畀你，我做咗二十七年，所以有兩個。」但隨着前年新管理層入主無綫，智叔終選擇離開。
雖然強調是在極友好的情況下與無綫分手，但離開工作多年的地方，智叔難免感到失落，他回憶說：「記得最後一日喺化妝間化妝，諗到原來聽日唔使返呢度，嗰剎那個心就好失落，情緒足足低落咗一排。」公司當時亦沒有安排任何儀式歡送智叔，只是當時正拍攝劇集《本草藥王》的監製走過來跟他握手，說一聲：「走喇？」
智叔坦然離開無綫，是因為不滿改革後的新合約安排及經常要返內地拍劇，他說：「作為一間資歷咁深嘅大公司，改革無可厚非，但最重要你要話到畀人知你想點改，同埋我睇唔到簽約後嘅前景。而且又要成日返內地拍劇，一去就一兩個月，咁我不如自己（自由身）上去拍啦，收入應該仲好。」
努力適應環境
人到中年忽然轉工，智叔表示家境雖然不算富裕，但因向來節儉，對物質要求亦不高，故沒有經濟上的壓力，所以他與太太陳敏兒商議後，終決定離巢。智叔始終不認為當時的決定很博，他以足球作比喻說：「中年嘅人仲有下半場，可以排過個陣勢，既然上半場有兩球在手，我繼續攻又得，打防守又得，視乎教練嘅需要。」
智叔自言在娛樂圈浸淫二十多年，算是較全面的藝人，既能在《全線大搜查》擔任主持，又能演出劇集及綜藝節目，事實上他離巢不久已被亞洲電視拉攏，目前又在有線和前立法會議員何秀蘭合作主持節目《我們都是父母》，與觀眾分享養兒育女心得。談到新工作環境，智叔不無欷歔地說：「我𠵱家都未係太熟入面嘅環境，人都唔係識得好多，TVB電視城梗係熟好多，話晒工作咗咁耐。」