對天主教教徒而言，教宗是神的代表，能夠跟教宗見面，是無上光榮。於一九五八年領洗的羅蘭，一直希望跟教宗見面，緊握他的雙手，但三次到梵蒂岡朝聖，都叫她失望而回。直至今次，羅蘭應無綫節目《向世界出發》邀請到梵蒂岡拍攝特輯，終可一償四十多年來的心願，在教宗本篤十六世緊握她雙手的一剎那，羅蘭激動得熱淚盈眶，她說：「好感動，真係感動到想喊出嚟。」 撰文：戴彩煥
九五年，羅蘭第一次到梵蒂岡朝聖，行上樓梯級時，因為身體不適嘔吐大作，要留院醫治，沒機會跟教宗若望保祿二世（PopeJohnPaulII）見面；數年後，羅蘭再到梵蒂岡，教宗卻去了夏宮度假，又再緣慳一面；到○○年，羅蘭第三次朝聖，雖然見到教宗，但跟教宗相距甚遠，未能跟他握手接觸，再令羅蘭失望而回。
車子愈駛愈近
羅蘭說：「今次TVB叫我去梵蒂岡拍嘢，一聽到梵蒂岡個名，就即刻應承，心諗：『唔知有冇機會見到新教宗本篤十六世（PopeBenedictXVI）呢？』所以出發前我好誠心咁祈禱，希望可以見到教宗，希望佢能夠祝福香港人。」
今次到梵蒂岡，前後花了十二日，在抵達梵蒂岡翌日早上九時許，羅蘭已跟無綫攝製隊在聖伯多祿廣場守候，眼見整個廣場擠滿了人，羅蘭不禁嚇一大跳：「聽講當日有十二萬嚟自世界各地嘅人去到廣場，佢哋係教宗邀請嚟嘅教友，由於我哋係攝製隊，所以得到特別通融，可以去一個近啲嘅位置見教宗。」
十一時許，教宗完成祝禱儀式後，在便衣保鑣護送下乘車離開，站在老遠的羅蘭顯得很緊張，更走上前看看教宗的座駕究竟駛往哪個方向，沒料到教宗的座駕真的朝着自己的方向駛過來，且愈駛愈近，羅蘭見機不可失，遂衝上前高舉雙手迎接教宗，結果她終於成功跟教宗握手，了卻四十多年來的心願。
談及今次握手經歷時，羅蘭仍難掩興奮：「好感動，真係感動到想喊出嚟。見佢部車駛埋嚟，對腳好自然咁行埋去，唔知點解佢身邊啲人又冇阻止我，我嘅祈禱靈驗，真係開心過中彩票。雖然只係短短十幾秒，但佢個樣永遠印喺我腦裏面。」
母親冒險買糧
羅蘭的已故母親亦是天主教教徒，今次到梵蒂岡朝聖，羅蘭亦一盡孝道為母親舉行彌撒，祈求將來在天堂跟母親見面，羅蘭說：「媽媽好偉大，當年打仗香港糧食好短缺，媽媽就將啲大床單染黑嚟做衫，然後攞去惠州賣，賣咗後就帶幾斤米返嚟，媽媽係行路去惠州，每次行足八日八夜，好辛苦。嗰陣去惠州好危險，俾日本仔見到嘅話，會俾佢哋開槍打死，但媽媽為咗啲仔女，幾危險幾辛苦都照去，諗起呢啲，如果媽媽要我條命我都畀。」
原來，自從羅蘭母親九四年病逝後，羅蘭一直帶着母親的照片在身邊：「媽媽好鍾意旅行，到我知道有朝聖之後，媽媽身體已經好弱，去唔到歐洲，所以我去到邊都帶住媽媽張相，等我無論去到邊度，媽媽都可以同我一齊。」而羅蘭今次梵蒂岡之行，將安排逢星期一至五晚在無綫《向世界出發》中播出。
