今年踏入五十歲嘅呂良偉，同年輕十四歲嘅富婆嬌妻楊小娟喺五年前結婚時，基本上已經全職慰妻，經常被傳媒影到陪老婆shopping。上個禮拜二晚七點幾，阿呂兩公婆又去咗中環IFC商場逛街睇戲，但阿呂全程木口木面，唧都唔笑，心情似乎麻麻哋。
睇《本能2》
嗰晚楊小娟喺首飾店揀頭箍同耳環，阿呂就行埋一邊煲電話粥，講講吓索性行出門口傾，到講完電話返入舖頭，見老婆仲未揀完，開始有啲唔耐煩，擰歪面四圍望之餘，仲用背脊得住老婆，突然使出一招兩指掹鼻毛，幾鬼得人驚呀！
呢一幕楊小娟當然睇唔到喇，因為佢忙緊簽卡找數。買完嘢後，兩公婆又行去隔籬戲院，阿呂負責揀位買飛，佢哋睇嘅應該係由莎朗史東（SharonStone）主演嘅三級片《本能2》（BasicInstinct2）。
由於距離開場仲有時間，楊小娟再去連卡佛女裝部掃貨，冇晒表情嘅阿呂就連去洗手間都唔得閒，要繼續做跟得老公奉陪到底。
