有冇諗過持有半島酒店嘅上市公司點解叫做大酒店，唔叫半島酒店？原來除咗北角嗰間另類「大酒店」外，港島區真係有間「香港大酒店」。
今年大酒店嘅年報晒歷史，將大酒店喺十九世紀末發展初期崛起嘅傳奇故事娓娓道出。原來大酒店最早嘅旗艦酒店物業，並唔係尖沙嘴半島，而係喺𠵱家中環中建大廈嘅香港大酒店，洋名「HongKongHotel」，早喺1868年開業，比1928年先落成尖沙嘴半島早得多。
以別名E.S.Kelly入股
話說當時香港冇一間自己嘅豪華酒店，於是蘇格蘭人DouglasLapraik、德國人GustavvonOverbeck男爵，同香港黃埔船塢董事CHMBosman發起喺香港興建一間豪華酒店叫做HongKongHotel（即係香港大酒店），當時選址中建大廈嘅所在地。
有冇發現三個創辦人裏面唔見大酒店現時嘅大股東嘉道理家族呢？其間一匹布咁長嘅歷史，八方唔講咁多，淨係講小電王米高嘉道理嘅祖宗，點樣加入大酒店嗰段畀各位讀者知道。
話說，香港大酒店其後買埋𠵱家中環置地廣場告羅士打大廈嗰幅地皮，將酒店範圍擴展到海旁，當時香港仲未有股票交易所，酒店入面嘅走廊就成為咗香港證券經紀進行交易嘅地方，一班喺嗰度搵食嘅經紀當中，有個以別名E.S.Kelly做買賣嘅經紀，佢喺1890年用呢個「朵」，買咗25股香港大酒店股份。呢個Kelly真名係Eleazar（Elly）SilasKadoorie，咪就係電王嘅祖宗囉。
由於大酒店愈做愈旺，嘉道理兄弟終以真名入股，仲不斷增持，直至上世紀20年代初，嘉道理家族已執掌控制權，透過收購同自行開發，成功喺香港、上海同北京建立一個一流嘅酒店集團，仲將公司易名為香港上海大酒店。
老香港都有聽過，1926年發生咗一場大火，之後香港大酒店將北翼賣咗畀香港置地，南翼就賣畀中建企業。就係咁，喺1928年建成嘅九龍半島酒店，取代咗香港大酒店，成為大酒店公司嘅旗艦酒店。
爆料熱線：29290000、27860099
報料傳真：26239278
報料電郵：[email protected]
