「平時買衫都會親自去揀，出席普通活動時，都會着番自己買嘅衫。我平時比較鍾意着二手衫褲，有時係貪平，同埋唔會咁容易同人撞衫。其實男仔買衫都唔係好難，主要都係以便服為主，我多數會去日本同泰國買衫，一年會入兩次貨，每次大概會使三萬蚊。」
劉浩龍至強綠帽
「頂帽係朋友送畀我，因為『7』字同綠色都代表我，𠵱家我已經有八頂綠帽。由細到大好多人問我點解要戴綠帽，我都會答使乜驚呀？要對自己有信心。如果要發生，戴乜嘢色嘅帽都會發生。呢條牛仔褲係二手褲，最初兩個窿冇咁大，點知愈洗就愈爛得犀利，再咁爛落去，遲啲可能變成三個骨褲。」
方力申戒指點睛
「以前做運動員好少戴咁多飾物，但係入咗行之後，有時出席唔同場合，着唔同嘅衫，如果有啲特別嘅飾物襯吓，又會好似有種錦上添花嘅感覺。好多牌子嘅飾物我都經常戴，好似DeepAnger、Zucca或者Bvlgari，有好多都好特別，而且好多時每個設計都有好多detail位。」
黃宗澤粉色清爽
「男仔着衫通常都以自然簡便為主，嚟緊夏天，一係着雞翼袖，一係就T恤，天氣熱會着啲比較鮮顏色嘅衫，我覺得自己膚色黑，所以適合着啲粉色嘅衫，對比會強啲，望落去個人都精神啲，今日特登揀埋粉色鞋嚟襯。飾物方面，我手上呢條黑色皮手繩勝在百搭，襯乜都得。我對飾物要求唔高，始終都係用嚟襯托，唔會成日花錢買，夠用就算，反而我會捨得買衫多啲。」
採訪、攝影：駱華齡、馬建華、黃君怡、卓寶花、陳慧安
