兩星期前路過旺角行人專用區，又見到大群人圍圈狂閃，慣喇，旺角每隔三五七日總有人圍圈影相。行近，望望，原來今次狂閃的對象並不是甚麼舞獅、派Condom、Showgirl或者話劇，大家目光聚焦在4隻外形古怪醜陋的小狗身上。「嘩！點解呢幾隻狗咁醜樣？」「全身都無毛，無毛狗？」「佢哋個樣真係好似妖怪。」評頭品足之聲不絕於耳……醜？確實醜，不過醜得大有來頭，因為牠們全港只得十多隻，非常罕有。
記者：羅灝汶
攝影：譚盈傑
原產祖國
4醜狗狗種屬冠毛犬，原產地中國，奇在身軀無毛無斑點，只有頭部、雙耳、尾部與四肢長出疏落白色長毛，更奇的是，一胎數隻冠毛犬中，又總會有一至兩隻全身長滿長毛，而身軀長毛的冠毛犬則稱「粉撲」。主人黃先生：「冠毛犬係罕有犬種，跟開一個主人就會好忠心，一交畀其他人養就會情緒好低落。佢哋性格非常開朗、活潑，又好聰明，天生鍾意同人玩。」那為何有長毛「粉撲」？「相傳正因為冠毛犬天生無毛，所以一胎中總生番一兩隻有毛，作用係幫助其他同類保暖，我翻查過好多冠毛犬歷史，原來慈禧太后都養過，絕對係貴族犬種。」談起狗隻名字就有古講，話說阿Dee與威仔誕下森美與小儀之時，黃先生：「嗰陣個心真係十五十六，心諗如果一胎兩隻都係狗女，我會改名阿嬌阿Sa，結果係一狗仔一狗女，就改名森美同小儀。」結果一男一女跑出，森美與小儀變狗，慘！
全港極罕
現時全港只得十多隻冠毛犬，當年花$20,000從澳洲引入第一隻冠毛犬的就是黃先生：「中國已經好少冠毛犬，𠵱家大部份中國冠毛犬都喺澳洲出產。」香港現有冠毛犬大部份來自他家，而且獲得無數獎項。
養了4年冠毛犬的他照顧狗隻親力親為，希望所有愛犬都健健康康：「我屋企有8隻狗，除咗佢哋4隻之外，另外仲有4隻維比特獵犬，我好鍾意揀養罕有狗種，親自打理狗隻先清楚佢哋嘅唔同習性。我全屋8隻狗每月花費只不過$1,000，因為我控制佢哋飲食紀律，統一佢哋糧食兼每日只准佢哋食一餐，沖身打理又係自己搞掂，同埋睇多啲書學習點養狗，自己又配埋藥畀佢哋，慳番好多醫藥費㗎，其實養狗都可以好平，識養就唔會使好多錢。」他強調如果有朋友想領養，只要有愛心，他會無條件轉送不收分文。
Snapshot
冠毛犬不用穿衣
冠毛犬本身並無體臭，亦不會換毛，不過有一點要注意的是，由於牠身上無毛，所以很容易出現皮膚發炎或受傷，不小心處理就容易出現狗隻皮膚癌，黃先生：「我建議用我哋平時沖涼用嘅梘液同磨洗膏幫狗仔沖涼，可以幫狗仔去身上死皮，令佢哋更健康。」另外，冠毛犬有自行調節體溫的能力，冬天也不用穿衣，有些主人會買狗衣給愛犬，這樣反會破壞小狗的天然體溫調節系統。
