鍾意食，梗鍾意掃街，不過身邊一定有啲姿整朋友怕街邊多人又污糟。唔怕，利舞臺最近有新搞作，十層新式食肆，環境舒服又乾淨，日式、泰式、中式、西式樣樣齊，小記街訪之後才發覺十個有八個都唔知道利舞臺有十層新食肆，聽完仲好似發現新大陸咁，𠵱家先帶大家掃住4間食肆！
記者︰方綺君
攝影︰楊錦文
model︰Winne、Phoebe@Salvador
熱食都咁爽：海膽醬汁煮稻庭烏冬$120
多數冷食的稻庭烏冬，想不到熱食都可以咁爽滑，以日本海膽製成醬汁撈勻，濃濃的海膽味有幾分似芝士。
01伊勢 日本入貨一星期得兩件
第一站係伊勢日本料理，但係日本餐廳開到成行成市，點突圍？伊勢一星期有六天特地從日本築地、九州等地入口新鮮魚生，確保用料新鮮，近日更推出全新夏日menu，餐廳亦會定期兩個月左右轉換一次小食和前菜菜單，務求令食客次次光顧都會有新鮮感。
今期最非試不可，一定係佢哋專誠喺日本築地魚市場訂購的吞拿魚（近頸部位置），一星期只會有兩件，餐廳負責人話好搶手，最好先預訂，不過因為太受歡迎，唔好意思，最快要等到月尾先可以食喇！
肥美足2kg
每件大約2kg。此位置較少郁動，所以特別肥美，咬落啖啖肉，雪花位置可以做10至15件壽司，其他位置可以用鹽燒或醬燒的方法，足夠4至5人份量。
櫻蝦沙律$40
日本空運到港的櫻蝦，經油炸處理，味道鮮甜有鮮味，唔似蝦米得個鹹字，拌上清新的沙律，味道剛好。
朴葉醬汁牛肉燒$70
以東京獨有的岐臬縣的鄉土特產，大大塊的朴葉，加入秘製醬汁、美國安格斯牛肉，連小火爐上可以自由控制牛肉生熟度，香氣感覺似煙熏牛肉，入口非常惹味。
蕎麥麵壽司卷$60
紫菜包住蕎麥麵條及餡料，中間餡料可選炸蝦、豬扒或軟殼蟹。食入口有淡淡蕎麥麵香，加埋炸到卜卜脆的炸蝦，正！
伊勢（28821388）
地址︰銅鑼灣波斯富街99號利舞臺廣場6樓A-B舖
營業時間︰12:00nn-3:00pm、6:00pm-12:00mn
02金不換 2日換料保新鮮
食過日本菜，不如試試味濃又開胃的泰國菜。泰國菜味道出名惹味，冬蔭功、辣椒膏蟶子皇，全部火辣辣。其實泰菜亦有清新的餐前小食，海蝦刺身和西施柚沙律，味道開胃，與其他菜式有強烈對比，幾時都話食泰菜真係一次多種的味覺享受啦！
裝飾來自泰國
加上餐廳的用料兩日就會換一次存貨，保證新鮮，若發現來貨質素差而影響菜式出來的效果，餐廳大廚會即時抽起菜式，對食物咁有heart當然值得鼓掌，而且無論裝修到用料全來自泰國的，和去了地道菜餐館無分別，淨係食個景都值回票價。
「荷目」海鮮金瓜$138
「荷目」是泰文焗的意思。金瓜隔水蒸腍，再釀入蝦、魚柳、青口、蜆等焗至金黃色，連金瓜肉都可以一併食，份量多，最啱撈飯。
包羅萬有（蛋網海鮮金邊粉）$75
炒金邊粉加上海鮮，包在製作功夫多多的蛋網內。炒金邊粉落足茄汁炒，酸酸哋好開胃，一次過可以掃兩三碗。
海蝦刺身$88
選用正宗海蝦，比一般的草蝦更鮮味，價錢相差一倍，配上青檸、魚露、蒜粒和糖等秘製的醬汁拌吃。
金不換（28901993）
地址︰6樓C-D舖
營業時間︰11:30am-11:30pm
03菓一道 無豬無牛無味精
無牛賣、無豬肉食，唔落味精、雞粉，你會問︰「乜都無，食西北風呀？」非也！以健康餐為大前提的「菓一道」，所有菜式均選用白肉及海鮮，米飯則用上對身體有益的糙米飯，唔落味精和雞粉，絕對健康。
用油好刁鑽
用油都好講究，選用第一層初榨橄欖油，即是純粹用機械方式，從成熟的橄欖果實中抽出第一輪榨出來的油，所以未經過任何加熱和化學處理，保留大量橄欖的天然香氣、味道和色澤，就如中國人的頭抽一樣特別矜貴。對於日捱夜捱，食無定時、習慣食無益快餐嘅你同我嚟講，簡直係搵到清泉一樣！
青木瓜菠菜海斑魚卷配紅菜汁薯茸$68
將爽脆新鮮的青木瓜及鐵質豐富的菠菜，釀入魚柳卷內，將紅菜頭汁入薯茸內，好有營養。
清泉荔枝蒸虎蝦$68
新鮮虎蝦打成膠狀後清蒸，燒青瓜內釀入糙米、野米等，汁料用荔枝及茉莉花加少許糖製成，甜而不膩。
菓一道健康餐廳（31677683）
地址︰7樓A舖
營業時間︰12:00nn-10:30pm
04easeofmind意×法菜=紫色
easeofmind主理意大利和法國菜，糅合傳統和創新的烹調方法，當然唔係sell正宗西餐咁簡單。未入店內，已經覺得好閃、好紫，水晶燈配紫色紗布，好鬼浪漫，負責人都話︰「聽我哋個店名，就知道餐廳意係希望有一個舒適嘅地方俾客人去relax。」
沒錯，全店以紫色為主調的設計，兼具現代與古典印象，擁有清爽淡雅又堅持浪漫的高貴氣質，紫色亦容易讓人心情放鬆，消除倦意，最適合行街行到攰或者坐低講人是非嘅hea地方。
Tiramisu$58
傳統Tiramisu做法，有少許酒精成份，食後能提神，故從前的人相信Tiramisu有藥用功效，有病食完立即好番。easeofmind的Tiramisu用了三種酒製作，加上香滑的忌廉芝士，是店內最受歡迎的食品之一。
香煎比目魚配刁草銀魚柳汁$128
用來自太平洋的比目魚，香煎後配上清淡的銀魚柳汁，咁light嘅菜比較適合細食嘅女仔。
easeofmind（35824034）
地址︰7樓D舖
營業時間︰12:00nn-12:00mn
食客兩句
