智叔在剛過去的金像獎頒獎典禮中，憑《殺破狼》獲提名角逐最佳男配角獎，基於對大會的尊重，雖然剛經歷喪子之痛，但智叔仍堅持出席頒獎禮，惜敗在黃秋生手下。其實智叔今次已是他第三次獲提名最佳男配角，首度提名是九三年憑《籠民》中飾演喬宏的智障兒子一角，更憑此角色奪最佳男配角。
人比人比死人
談到演戲，智叔謙稱沒有特別心得，更遑論成就，他說：「我唔覺得有成就，只係算有啲成績，行街會有人叫吓你，距離成就仲好遠。我對自己冇定一個目標話要攞乜嘢獎，做乜嘢角色，我係一個冇諗得咁長遠嘅人。
「當初入行係自己對演戲有興趣，諗住做吓先，點知一演就演咗二十幾年。我嘅期望唔係好高，只要工作謀生，滿足到戲癮當然最好，至於成績就係咁多。我有一個原則，就係唔好同人比較，人比人比死人。」