「我着緊呢件係米奇老鼠Tee，同一般嘅Tee分別在於成個圖案都係用人手逐粒逐粒釘上去，手工極之仔細。簡簡單單喺件Tee釘上閃石，令到成件衫搶眼好多，仲有一種高貴效果。而手上戴緊嘅水晶手鏈，係師傅送畀我，師傅會跟據我嘅事業、健康同感情配搭適合水晶，再串連而成。」
黎姿夏日金光
「今次出席嘅場合比較隆重，今年夏天女士興金色，而且我都好鍾意呢個牌子，平時我都會去幫襯買一啲飾物，我覺得着衫最緊要配搭，有時唔一定要貴。好似我身上條頸鏈都係日本旅行時買，見佢幾特別，最好用嚟襯一啲隆重嘅衣着，又唔會金光閃閃太俗氣，所以我都會成日買啲啱心水嘅飾物佩戴。」
廖碧兒簡約怡人
「夏天就嚟啦嘛，所以應該着得fresh啲，我着呢件粉綠色衫感覺就夠晒清爽喇，今年仲應該會興呢一類顏色。我呢身打扮雖然好簡單，不過襯埋一齊又唔會好普通，夏天去啲比較莊重嘅場合咁就啱晒啦，不過平時我就鍾意着得sporty少少，可以輕鬆啲嘛。」
蔡卓妍自畫三間
「我一向都着adidas，呢款自己畫嘅鞋我買咗好多對呀！但其實我之前都鍾意喺鞋上面畫嘢。呢對嘅花紋我諗咗一個月先敢落筆，最終四個鐘先畫得晒，而且之前仲用鉛筆喺對鞋上面畫咗稿先，不過到最終畫錯咗少少。同埋我喺個鞋度寫埋自己個名Sa字，咁就會特別啲，係世界上唯一嘅一對。」
採訪、攝影：藍文浩、王連連、馬建華、卓寶花
