政府高官當中，唐英年今季最有養馬運，兩匹愛駒「富士晨曦」同「心福」合共贏五場頭馬，認真威水，每次唐唐拉頭馬，都會邀請肥龍許仕仁（圖左）一齊拉頭馬happy吓，噚日終於輪到肥龍威番次，佢名下嘅「有聲有色」喺一場泥地千二米勝出，肥龍自己袋番二十幾萬頭馬獎金，雖然唔算好多，但今次係佢做咗政務司司長後第一次贏馬，總算有意思，可惜嘅係唐唐冇到場，唔能夠分享肥龍嘅喜悅。
肥龍除咗「有聲有色」之外，本來仲有隻新馬「聲色妙韻」由三屆冠軍練馬師蔡約翰訓練，不過蔡約翰向肥龍講，隻馬太頑劣難教，所以早排已申請退役，好在肥龍即將有另一駒運港，希望佢隻新馬將來生生性性，幫馬迷贏錢。除咗肥龍，田北俊隻「新東武士」噚日打開在港勝門，可惜田少冇入場，搞到拉頭馬嗰陣場面冷清清。
爆料熱線：29290000、27860099
報料傳真：26239278
報料電郵：[email protected]