鄺佐輝：演藝為興趣
我喺TVB做咗二十八年，做保險從業員方面，下個月就做咗二十二年。我做保險唔係因為TVB份糧唔夠使，夠唔夠使係睇你追求啲乜嘢㗎啫，做演藝係為興趣，做保險係因為可以幫到人。不過，呢幾年大家都明，公司計騷方法同以前唔同咗，對某啲同事嚟講工作量少咗，收入冇咁穩定，如果某啲同事認為目前工作未有一個好嘅發揮，而考慮另一個工作環境，我認為咁都啱嘅。
鄧一君：搵到更多錢
當年我轉做保險嘅原因，係因為我覺得娛樂圈沉寂咗，發展空間唔大，但保險係香港三大行業之一，發展空間好大。事實證明我冇揀錯，我𠵱家搵嘅錢，比TVB時期多好多，又攞埋獎，保險業有好大發展空間，劉錦玲轉做保險，我覺得係明智之舉。