話說呢輪煲呔肥龍兩兄弟同民建聯打得火熱，簡直當民主派死嘅，呢兩位沙煲兄弟嘅表現，就好似啲失戀少男，你民主派扮高檔，我就去搵個聽晒老竇話兼相貌平庸嘅女子又錫又攬，等你睇到眼火爆，然後後悔走寶。
呢啲咁天真嘅行徑真係令人覺得可笑同可悲，不過，接近煲呔人士就解釋話，回歸之後，政府喺立法會冇票，如果唔同啲黨結盟，就要鋪鋪去拉票，班問責高官真係唔使瞓都唔掂。咁又係，有民建聯支持，加上泛聯盟同自由黨，煲呔嘅政策通過就有保證，但正如白鴿黨嘅李永達（圖）講，呢個世界山水有相逢，有朝一日煲呔要求佢哋攞票就知死。
八方問白鴿黨中人，會唔會學民建聯請肥龍入營，佢哋話唔會囉，仲嫌食得檸檬唔夠咩？舊年佢哋就施政報告同政改都請過肥龍同孫公出席研討會，但係兩個都冇蒲頭，所以以後都冇再請。
傳真︰2623-9278
電郵︰[email protected]