今日繼續講從瑞士帶回來的東西，唔係講錶，而係一本時裝美藝雜誌《Qvest》。話就話係資訊爆炸嘅年代，上網搵料幾時都比摷書摷雜誌更容易，但總有鋪買雜誌癮，尤其喺外地，一見新書新雜誌，掀兩掀之後都冒住行李過磅嘅危機，點都要陀住返香港。呢本《Qvest》成吋咁厚精美粉紙印刷，斷估都有成包米咁重。原本係柏林出版的時裝雜誌，當然是德文版，睇唔明通常都唔會買，因為睇相之餘亦鍾意「Lun」字（唯一例外應該是意大利版《Vogue》，啲相太勁，睇唔明都要買）；今次本《Qvest》是半年版特別號，最重要是竟然是英文版！於是放低二十瑞士法郎買起佢。
返到香港細閱更不得了，半年內容當然有猛人助陣，Contributor名單有HediSlimane（DiorHomme設計師）、JuergenTeller（著名時裝攝影師）等大名唔使多講，更讓我見識到一班歐洲時裝美藝人的作品，平時因為語言問題唔多有機會認識，例如這一輯時裝造像，模特兒跟海獅蜥蜴同攝都幾厲害，操刀影相的DanielJosefsohn，乃歐洲著名攝影師，當地圈子無人不識，早在李安拍《斷背山》前經已為美國一位GayCowboy造像及拍攝紀錄片，如果不是這本《Qvest》英文版，睇嚟我呢世都未必知道有這個人！