美國紐約啱啱今個禮拜三搞咗個車展，一眾車廠大晒冷，當中有架概念車，內櫳成個飛機駕駛艙咁，前衞兼大膽！
睇真啲，原來係歐洲牌子紳寶（Saab）嘅最新作品「AeroX」，設計師更加令八方與有榮焉，因為係同聲同氣香港人羅偉基！
羅偉基八五年喺當時嘅理工學院（即係𠵱家理工大學）工業設計系出身，跟住去咗英國讀汽車設計，俾啲歐洲汽車名廠爭住請，好似蓮花（Lotus）、奧迪（Audi）、平治（Benz）呀，全部做過晒，兩年前又跳槽去通用汽車旗下嘅紳寶，專門設計概念車，呢部AeroX就係佢嘅傑作。
「最佳展品」環保又型仔
AeroX內櫳成個飛機駕駛艙咁，如果冇四個轆，分分鐘以為自己揸緊飛機，加上用甲醇驅動，乾淨環保，今年二月喺瑞士日內瓦首次露面就一鳴驚人，俾雜誌《AutoWeek》評為最佳展品，直頭係港人之光！
汽車設計不嬲都係鬼佬天下，羅偉基異軍突起，真係唔簡單，佢話華人比鬼佬重視細節，所以喺汽車設計其實好吃香，為咗鼓勵多啲華人做呢行，佢仲話已經接觸香港同大陸嘅大學，搞吓類似課程培養人才咁話。
傳真︰2623-9278
電郵︰[email protected]