蔡瑩璧去咗王永平度返新工已經一段時間，但係佢嘅接班人邱騰華就仲未見影，早前有消息話佢老哥已經鐵定四月二十四日（周一）上班，到時副處長陳任慧芬就可以唔使再署理啦。
所謂新人事新作風，邱生雖然唔係新聞主任出身，但係都身經百戰，知道啲傳媒要乜，當然八方估佢就唔使好似蔡小姐當年跟老董咁辛苦，要兩頭騰，一時坐喺舊總部特首辦，一時又要返美利大廈政府新聞處辦公。
煲呔做嘢始終比老董利落，要人用就正正式式請個新聞統籌專員，有何安達同陳羿，就唔使邱生係咁騰上騰落，到時只要何安達佢哋一出聲，成個新聞處自然會鼎力支持。始終何專員有咁多馬仔，新聞處就人多勢眾兼且專業啲。
講開新聞處，八方忽然想起港台，因為有人話如果港台真係有機會脫離政府，咁以後政府喉舌嘅工作就由新聞處負責，一叫得做喉舌，就馬上俾人扣分，真冇癮。
傳真︰2623-9278
電郵︰[email protected]