如果大家仲記得，人稱吉叔嘅黃應士近年最搞笑嘅，莫過於喺美軍打伊拉克時，戴住個豬嘴（防毒面罩）喺科威特上鏡做扒（圖），結果俾鬼報當笑料報道，搞到老貓燒鬚。睇嚟吉叔仲耿耿於懷，佢噚日上商台節目就特登解釋，其實啲歐洲記者仲誇張過佢，佢哋連防毒衣都着埋！
吉叔話，伊拉克打科威特曾用毒氣彈，就喺做扒嗰日，科威特已經響過八次警報，所以伊拉克係可能重施故技，戴面罩係有需要嘅。
不過大家又唔好以為吉叔驚死，其實佢早已將生死置之度外，因為佢係虔誠嘅基督徒，八五年仲差啲冇命！話說嗰陣吉叔喺美國食團年飯，食咗條魚骨落肚都唔知，過咗冇耐個肚勁痛，但睇過幾個醫生都查唔到乜事，有醫生仲搞錯係盲腸炎。
好彩個醫生都未懵得晒，仲識得幫佢照X光，咁先發現原來條魚骨整傷條腸，結果就切咗十二吋腸，如果個醫生發現唔到，分分鐘會有生命危險㗎！
傳真︰2623-9278
電郵︰[email protected]