年近四十的前花旦劉錦玲，當年出道曾與影帝級的劉德華與梁朝偉結片緣，但近年其事業發展大不如前，去年在無綫平均月薪僅約四千五百元，實在搵食艱難，毋怪乎繼蘇杏璇轉職小販賣藥枕後，劉錦玲也上堂進修，待考試及格後便轉行做保險從業員。
劉錦玲在娛樂圈浮沉十六年，於亞視藝訓班出身，全盛期曾與劉德華合演電影《天長地久》，亦夥梁朝偉拍過《風塵三俠》，其後跳槽無綫主演多部劇集。奈何轉投無綫後發展急走下坡，由一線花旦跌至三、四線配角，在去年播出的劇集《學警雄心》中，今年三十九歲的她竟扮演薛凱琪媽咪，至劇集播完，劉錦玲曝光率更近乎零。
八月約滿
為生計謀定後路
據知劉錦玲近年工作量大減，與無綫簽約一年一騷制，每騷價約三千元。去年她曾參演約六個綜藝或特備節目，每次演出一騷計，即共約一萬八千元；另外在劇集《法證先鋒》中佔戲六集，每集則以兩騷計，即每集價六千元，六集共收三萬六千元，換言之全年無綫人工合共約五萬四千元，平均月薪僅四千五百元而已，確實非常廉價。
日前本報報道前無綫女藝員、專演慈母角色的蘇杏璇轉行到旺角花園街擺檔賣藥枕維生，曾在樂壇竄紅過的趙學而也因幕前事業不如意而改投美容界；在無綫收入微薄的劉錦玲亦不得不向現實低頭，雖則今年八月才約滿無綫，但已急不及待謀後路，經朋友介紹轉職保險行業。
前日早上十時，洗淨鉛華的劉錦玲獨自於銅鑼灣希慎道宏利保險中心出現，當時她戴黑框眼鏡遮掩素顏，身穿恤衫西褲，拿着環保袋，正準備上樓接受保險課程訓練。
殘酷現實
「娛樂圈機會唔多」
劉錦玲對於轉行做保險之事直認不諱：「雖然我都鍾意做戲，但暫時娛樂圈機會唔多，希望試吓另一條路，自我增值，𠵱家只係上堂先，之後會正式考試，如果及格就會轉做保險，繼續再考埋基金投資同旅遊保險等課程，都幾辛苦㗎。」劉錦玲對通過考試滿有信心，更笑說：「預計考十次以內一定得。」
今次劉錦玲加入保險界全賴朋友推動，但作息時間跟之前拍戲完全不同，需要一段時間適應，她說：「平時冇凌晨兩、三點都未有得瞓啦，𠵱家日日都要早起，有啲唔慣，試過上堂瞌眼瞓，但慢慢應該會適應。我以前都做過售貨員，相信自己都有說服力，但一定唔會太急進，我都驚嚇走晒啲朋友。」
昨日劉錦玲再接受本報訪問時，她聲稱通常會在滿約前一個月才與無綫斟洽續約事宜，並說：「暫時都未有新工作，無綫有幾百人，好難輪到我，但繼續以呢種方式（一騷制）簽約，又唔排除會繼續落去嘅。」但對在《學》劇，飾演比她年少十四歲的薛凱琪母親角色，劉錦玲只說：「唔介意，都做咗十幾年，步向呢個階段唔係問題，戲入面配鄧浩光OK，大家都keep得好好，唔係咁老啫。」
採訪、攝影：李珮洳、卓寶花
