衞蘭前晚在九龍灣出席音樂會，獲同場演出的王菀之與方大同等在舞台上為她慶祝二十四歲牛一，𠱁得她大笑露脷環，完騷後再獲大班fans舉行街頭生日會，令她即場感動落淚。壽星女經過一輪又喊又笑後，終由盛傳與她關係密切、打扮中性的女助手護送她返抵家門兼上樓。
衞蘭（Janice）前晚與王菀之、梁漢文和方大同在九龍灣演出「MOTO903新樂潮拜音樂會」，二十四歲生日的衞蘭在會上搶盡風頭，獲大班fans撐場高舉HappyBirthday紙牌及大叫生日快樂，到音樂會尾聲時，方大同與王菀之更為壽星女舉行迷你生日會賀壽。衞蘭切蛋糕時頗為激動，更開心得一度擘大口露出脷環。
唔要男友只要狗
事後衞蘭說：「我好感動，因為冇預到有蛋糕，我嘅願望係想有時間養隻老虎狗，妹妹同一日生日，佢就嚟出碟，我都想佢好。」問衞蘭會否恨有男友？她笑說：「吓，唔好啩？我有人送花，不過係fans，都有人sms我嘅，總之好開心。」
其後衞蘭於十一時多離開會場，當時場外有約三十名fans等候，為她舉行街頭生日會再慶祝，而她也來者不拒，一一接受歌迷祝賀及收禮物。
親密助手陪上樓
接着有fans送上生日蛋糕，衞蘭便即場切蛋糕及閉目許願，fans問她許甚麼願時，她故作神秘笑說：「唔講得。」豈料fans說：「我都有個願望喎。」衞蘭即反問：「乜嘢願望？」fans答：「希望每年都可以喺呢度同你慶祝生日！」衞蘭聞言大為感動，鼻一酸、眼一紅，淚水即如泉湧，急忙轉面以紙巾拭淚。待情緒稍為平復，衞蘭對fans說：「我今晚返屋企，唔會出去慶祝喇。」之後就由被傳與她關係密切、愛作中性打扮的女助手阿端貼身護送上保母車，再陪衞蘭直返紅磡住所兼送上樓入家門。
採訪、攝影：娛樂突發組、駱華齡、陳俊強
