馬會主席夏佳理嘅任期好快到期，今年八月就會退位讓賢，由副主席陳祖澤接班，馬會主席一職，自滙豐大班浦偉士退任後，每位主席最多做四年，以做董事年資最耐嗰位接棒，但年滿七十歲嘅就要讓一讓，自動退休嘞。根據目前排名榜，陳祖澤會做四年主席，緊隨其後嘅郭勤功到時已滿七十歲退休，會由艾爾敦升上，跟住鄭明訓又已退休，施文信年紀差唔多，到咗二○一四年，會由現在董事排名第七嘅葉錫安頂上。但有人話，艾爾敦與葉錫安當年之獲選為董事，皆因佢兩個分別係滙豐亞太區主席及孖士打律師行高級合夥人，但兩位已自滙豐、孖士打退休咗，會唔會在適當時候識做，讓番個董事位出嚟畀現任滙豐亞太區主席以及孖士打高級合夥人呀，如果此話成真，到咗二○一○年，或者最遲二○一八年，周永健就會係馬會主席咯。
夏佳理係難得人才，法律界一致認為佢聰明絕頂，對證券法、公司法熟到極，故此李業廣今個月底唔做港交所主席之後，盛傳夏佳理係大熱門接替人選。夏佳理做律師，自胡關李羅出道而紅極一時，李退休，夏接上，正是同門交棒，預料政策不會變，況且夏佳理與周文耀都一齊打過馮景禧嘅工，相識三十幾年，主席與行政總裁肯定合作愉快啦。
一位證券界資深人士睇到夏佳理出任港交所主席嘅報道後，對左丁山講。「傳聞是否屬實？」左丁山話：「未公布，唔敢講，但最近報紙爆親啲料都係全中，唔敢唔信。」資深人士說：「咁就可以講話港交所深慶得人，夏佳理管慣馬會馬場，轉而睇實港交所，基本上就係從賭場A轉過去賭場B啫。比唔賭馬嘅李業廣更加適合！」呢位仁兄又幾幽默喎，馬場與股市，都係講求賠率，熱門、冷門、實力、狀態（走勢）等等，大同小異，買賣窩輪期權等於投注三重彩、孖T，風險大，回報高。夏佳理唔做馬會主席而做港交所主席，直情係駕輕就熟。