牛仔褲就好似永恒不死嘅潮流，無論潮流點變都總會存在，由以前阿媽年代嘅喇叭，到後期嘅窄腳、賴屎、直腳，變完變、轉完又轉。好多人揀牛仔褲都有佢哋獨有嘅一套，好似Wyman同Designer Wallace對牛仔褲都各有見解，點着法都各有道理。牛仔褲就好似圓滑嘅人咁人人喜歡，喺潮流界生存無往而不利，所以佢𠵱家變得地位愈來愈高、價錢亦愈來愈貴。
記者：許維雅
攝影：陳偉強、林栢鈞
模特兒：Sandra＠Puremodel
Wyman：牛價一路升
Wyman（Wy） 記者（記）
記：你點睇牛仔褲呢個潮流？
Wy：着牛仔褲呢個潮流唔會變得好緊要，咩時候都會有人着。我覺得變嘅係牛仔褲嘅市場只會愈嚟愈大，愈嚟愈受尊重，好似JOYCE、LaneCrawford呢啲大公司都會間出一隅專放牛仔褲。
記：咁你自己覺得牛仔褲個Trend有乜唔同咗？
Wy：我覺得牛仔褲嘅價錢不停升緊，𠵱家啲人愈嚟愈捨得買啲貴嘅牛仔褲，好似以前靚嘅牛仔褲都係一千蚊價位左右，𠵱家全部牛仔褲都要二三千元一條，證明𠵱家啲人都會肯花錢喺覺得靚嘅牛仔褲身上。正如之前所講，牛仔褲市場愈嚟愈大，選擇亦愈嚟愈多，十年前只有Levi's、Lee等大牌，要買High-End牛仔褲就只有ArmaniJeans。但𠵱家牛仔褲市場除大牌Levi's同HighFashion牌子之外，仲多咗一個位就係HighFashion同大牌之間嘅牛仔褲，好似45rpm呢啲牌子。
記：今年會興啲乜類型嘅牛仔褲？點解？
Wy：其實牛仔褲好個人，我自己揀牛仔褲就好得意嘅，入到間舖，一條靚嘅牛仔褲係會發光㗎，你係唔會走雞㗎，佢會喺牛仔褲海入面排眾而出彈出嚟。當然一望到洗水同Cut靚係第一關，最後始終要搵個籮柚去試。我自己着牛仔褲嘅習慣都好得意，鍾意一條牛仔褲就會Keep住段時間條，我可以W
Wallace：Unwash回歸
Wallace（Wa） 記者（記）
記：你點睇牛仔褲呢個潮流？
Wa：我覺得牛仔褲潮流不停喺度變，早幾年興賴屎，買牛仔褲明明32腰都要買36，人人都買大幾吋，啲靚嘅牛仔褲一出，大Size冇得好快。其實男仔潮流好慘㗎，好悶，唔似女仔變化咁大。所以男仔揀牛仔褲款式嘅潮流變得好快，好似賴屎、爛褲着咗幾年都好悶。
記：今年會興啲乜類型嘅牛仔褲？點解？
Wa：今年我覺得會回歸番一啲唔洗水、直身、Slim少少款式嘅牛仔褲。因為今年男仔Style會偏向較斯文、光鮮嘅上身，好似Casual款式嘅恤衫、偏窄身嘅T-shirt，所以以往太過Raw太過爛嘅牛仔褲會唔襯，用啲唔洗水牛仔褲去襯感覺Match好多。不過，洗水牛仔褲永遠都唔會被淘汰，款式易接受，質地舒服易着，CasualFeel易襯衫。
記：最近入咗啲乜嘢新牛？
Wa：買咗一條A.P.C.NewStandardCut冇洗水牛仔褲一星期左右，自己好鍾意，用嚟襯恤衫一流！同埋價錢方面好抵買，都係一千蚊鬆啲。
記：你自己又點睇不同國家或者牌子嘅牛仔褲呢？
Wa：我自己好欣賞日本做嘅牛仔褲，睇得出佢哋好畀心機做，尤其係Detail位好強。相反洗水就係美國比較強，佢哋有咁多年做牛仔褲嘅技術，好多國家都學唔到。呢幾年好多歐洲大牌都開始出牛仔褲，款式Cutting都好好，好似DiorHomme第一季嘅洗水牛就一鳴驚人。
新牛展
男牛：洗水牛長賣長有，款式變化大又着得舒服。
女牛：女仔着衫選擇比男仔多，又有短裙又有短褲仔，所以女仔普遍喜歡着洗水牛，冇咁硬較舒服，唔使好似啲男仔咁不停喺牛仔褲潮流圈內氹氹轉。
ShopList：
（a）I.TKingstonStreet（28816102）
（b）Exitbydoublepark（27221751）
（c）I.T（28344056）
（d）JOYCE（28101120）
（e）Jeanious（21897148）
（f）Sistyr（25230786）
（g）SistyrMoon（21111172）
