以下全是真人真事：
朋友A：「我近期愈來愈喜歡睇恐怖片！唔係用氣氛去嚇你嗰隻，而係用視覺效果令到你作嘔嗰一種，覺得自己好變態……」
朋友B：「咁有咩好介紹先？我之前睇過一套恐怖片叫《群屍玩過界》，真係好核突，一開始講有個阿媽阻止個仔拍拖，突然俾隻『鼠猴』咬到，仲變埋怪物，之後就係一連串令人作嘔嘅死屍場面，最後一場群屍大亂鬥血流成河、屍橫遍野，點可能估得到一套咁古怪嘅電影係出自PeterJackson呢？」
朋友A：「其實我都睇過。幾得意喎！惡心得嚟又好好笑，唔知點解有大量港式動作場面。」
朋友A：「咁你有冇睇過《人玩鬼》系列呀？《人玩鬼》（TheEvilDead，1982年）、《人玩鬼II》（TheEvilDead2，1987年)同《人玩鬼III》（ArmyofDarkness，1992年），原來都係出自《蜘蛛俠》大導演森雷美（SamRaimi）嘅手筆，我都係近期先知道咋！」
朋友B：「哈哈！我一早知道啦。其實都有好多導演成名前都係拍Cult片！呢啲戲全部都可以喺VCD舖搵得番啦。」
金毛店員：「呢兩位先生，你哋真係勁喇。呢度係賣鹹碟嘅地方，你哋唔係買嘢就唔好阻住晒，仲學人喺度講電影，仲要講啲核突戲，我哋係賣型男索女嘅片，唔係買就過主！」
朋友A&B一齊面紅紅走咗，我喺隔籬就笑到彎晒腰……
