女子組合Cookies餅女傅穎（Theresa）同楊愛瑾（Miki），近半年都獲中性打扮嘅周刊女記者Amy做貼身觀音兵，早排Amy至陪Miki去尖沙嘴掃貨，幫手挽袋兼睇水，點知早幾晚又輪到Theresa要Amy陪佢逛街等車，Amy要照顧呢兩位餅女，相信都好唔得閒。
摩打腳鬆人
嗰晚十點零鐘，着住成身紅唇圖案嘅Theresa同Amy喺銅鑼灣世貿中心出現，當時Amy好威猛咁企喺對方身邊陪等車，其間Theresa昅到在場有記者，兩人竟然即時左右彈開，Theresa好揀唔揀，揀咗匿喺條柱後面，Amy就直情踩住摩打腳極速鬆人。
但Theresa都知扮柱女唔係辦法，鬼鬼祟祟咁揮手叫記者過去，問佢點解Amy走得咁快？Theresa就表現尷尬，死撐對方只係趕上樓做嘢，又話：「佢上去樓上嘅電影公司之嘛，你哋嚇驚佢（Amy）喇，我等車咋。」之後Theresa喺現場等咗一陣，當保母車駛至時，就同記者揮手講拜拜後，嗱嗱臨上車離場。
