政府收咗新界人啲雞，夠膽死唔肯賠錢，難怪啲居民咁鬼嬲。眼見自己人俾政府蝦，鄉議局點都要做啲嘢先得，所以佢哋決定咗，向每個曾向政府交出寶貝雞鴨鵝嘅新界人，送出一個價值五百蚊嘅金雞或者金鴨。鄉議局計過數，暫時交出嚟嘅雞鴨鵝有成二百四十幾隻，數數手指計一計，即係佢哋至少要攞成十二萬出嚟，認真大手筆。
問到鄉議局主席發叔點解咁慷慨，佢就話要反問吓政府，點解唔肯賠畀人呢？又話政府唔賠，咪我哋賠囉，要平息民憤㗎嘛，咁講即係落政府面，話政府小家子氣啫。
發叔致辭時再插政府一刀，話交雞嘅村民做咗一啲善行，一定要搞個表彰大會，對於佢哋呢啲善言善行作出表揚，仲特別要邀請周一嶽局長出席，真係字字珠璣，句句都有潛台詞，煲呔真係唔好忽視呢班新界人呀。
傳真︰2623-9278
電郵︰[email protected]