暴民家族日日開片<br>我未成年:張詠恩虐打Steven搣死金魚

暴民家族日日開片
我未成年:張詠恩虐打Steven搣死金魚

女子組合Krusty成員張詠恩(阿Jan)小時候有暴力傾向,除了經常虐打弟弟、組合Boy'z成員張致恆(Steven)和幼弟外,就連動物也不放過,一次在好奇心驅使下,竟生刮金魚鱗,結果小金魚當場斃命,她因而被父親痛打一頓!

張詠恩是男子組合Boy'z成員張致恆的胞姊,兩姊弟先後進軍樂壇,互相扶持,體現親情無價。萬萬沒想到小時候的阿Jan原來有暴力傾向,經常毆打Steven和另一個弟弟,將兩人打至遍體鱗傷。

T尺仆頭

阿Jan說:「有次我好大力咁用把T字尺敲落Steven額頭,佢痛到係咁攬住個頭,喺張床度碌嚟碌去,當時我真係好驚整穿佢個頭呀!」
還有一次,阿Jan出動防狼用的胡椒噴霧來對付幼弟,她說:「我喺加拿大買咗支胡椒噴霧返嚟,原本諗住出夜街帶住喺身會安全啲,後來唔知細佬做乜嘢激嬲我,我咪用嚟噴佢囉!佢吸咗入喉嚨之後,結果搞到氣管炎。」兩個弟弟長大後,不甘捱打而還手,阿Jan竟然跑去學跆拳道,實行見招拆招!
暴童阿Jan除了向胞弟動粗之外,就連手無寸鐵的小動物也不放過。那時家中養了一大缸金魚,阿Jan趁父親不在家,就偷偷撈起金魚來把玩。

禍從口出

阿Jan說:「我鍾意撈啲魚出嚟玩,有時篤吓佢,有時就拍吓佢,有次好奇咁刮咗佢啲鱗,點知佢死鬼咗,阿爸返到屋企之後當然打到我跳舞啦!」
阿Jan像其他小朋友一樣,經常童言無忌,終於禍從口出,她說:「有次跟阿媽去殯儀館拜一個親戚,行樓梯嗰陣聽到啲音樂聲,我就好順口咁問:『嘩,今晚邊個開band呀?』講完唔夠一秒,阿媽已經一巴掌摑埋嚟喇!」
撰文:李珮洳
部份圖片提供:張詠恩

5歲 甩繩馬騮
「Steven(右)細個嗰陣肥嘟嘟,好鬼得人鍾意,記得嗰時阿媽帶親我哋去飲喜酒,我哋幾姊弟一定好似甩繩馬騮咁周圍走,不過只要阿媽用凌厲嘅眼神望住我哋,我哋自然就會乖乖哋坐好。」

15歲 短跑飛彈
「我(右二)細細個已經好鍾意運動,所以後來都加入咗田徑隊,到中學嗰陣仲參加校際田徑比賽,當年我最叻嘅係100米同4×100接力。」

18歲 初踏天橋
「呢次係我(左)第一次正式做model行騷,嗰時真係好狼狽,趕唔切換衫又扣唔切衫鈕,不過嗰次最開心係見到吳彥祖,喺後台嗰陣我仲成日偷望佢,由嗰陣開始我已經好鍾意佢喇!」

24歲 餅印姊弟
張致恆(左)○三年出道,與拍檔關智斌合組Boy'z,去年胞姊張詠恩(右)亦與活己嵐組成女子組合Krusty闖樂壇。去年十月兩姊弟一同出席無綫台慶宣傳活動,驟眼看兩人真如餅印一樣。