前日海關偵破咗首宗利用陳皮梅藏海洛英案，女毒犯將近四百粒陳皮梅挖空藏入高純度海洛英丸仔，成為咗各大報章嘅頭條。而噚日凌晨吳君如、田蕊妮同鄒凱光喺商台做節目時，就攞咗呢單新聞出嚟講，其中田蕊妮同鄒凱光重肆無忌憚咁將佢哋啲朋友運大麻返港嘅經歷講出嚟。
喇叭藏毒
鄒凱光就講咗佢一個朋友嘅朋友運大麻失敗經過，佢話：「我有一個朋友嘅朋友嘅朋友，去完泰國食（指大麻）剩啲，又唔敢帶返嚟香港，但係又覺得好靚，咁佢就買咗套音響，將大麻放喺喇叭入面寄返嚟香港，點知部音響都寄失埋。」
而田蕊妮就話佢個朋友嘅朋友亦曾將大麻藏喺褲袋內，重成功偷運返港，佢話：「佢諗住過關嘅時候，啱啱有隻緝毒犬行過佢身邊，於是佢即刻行過去叫『hello，dolly，好cute呀』，跟住個海關就唔好意思，之後就過咗關啦。」
其實根據《危險藥物條例》，販運毒品最高可被判終身監禁同罰款五百萬，身為電台嘅主持，將運毒嘅事當笑話咁講，對聽眾有不良嘅影響，馮仁昭覺得電台主持人應該注重言行，無謂教壞人啦！
