又到Easter，忙咗一段時間，大家都想唞唞，八方聽聞煲呔同老婆今個假期會去廣東度假四天。
咦，佢舊年復活節，都係同曾太靜雞雞去咗廣東台山嘅上川島，到天主教方濟各沙勿略嘅墓地「朝聖」，今年冇理由故地重遊，特首辦就話行程唔會事先張揚，但係肯定好近香港，因為煲呔冇安排肥龍做署理特首，即係佢隨時有大件事都可以即刻趕回香港。
八方就估佢如果有時間，一定會返鄉下南海九江祭祖，歎番杯雙蒸，因為佢當上特區之首咁大件事，實在光宗耀祖，以煲呔嘅性格，梗係要向老祖宗稟告一吓啦！
既然遲啲要去內地，煲呔噚日就盡吓地主之誼先喺禮賓府招待到訪嘅深圳市市長許宗衡，咁樣預先打個招呼都好合規矩。
煲呔復活節外遊，肥龍同剛由北京返港嘅仁龍仔就坐鎮香港，至於唐唐就同一家大小出外度假，地點就唔肯透露，四月二十一日先返港，真係一個名副其實嘅顧家男人。
傳真︰2623-9278
電郵︰[email protected]