出爐金像獎最佳導演杜琪峯日前接受有線娛樂新聞台專訪，大談跟劉德華多年的合作關係，原來最初合作時，杜琪峯覺得華仔很姿整，故常問對方是否「一定要插隻手落袋先識做戲？」不過在磨練下，杜琪峯大讚現在華仔演技大有進步。
杜琪峯在訪問中大談跟劉德華的合作經驗，他說：「起初同佢合作，我成日問：『係咪一定要插隻手落袋先識做戲？係咪一定要梳到個頭整整齊齊先叫好？』直至拍《暗戰》時，我同華仔講：『習慣唔好再擺姿勢去演戲，呢度唔係紅館。』我諗佢當時好痛苦，不過睇住佢愈嚟愈有自信，同明白電影係乜嘢，有好大進步，慢慢就建立起一份自信，當然我認為佢最好唔好再投資拍戲啦。」
「唔會無故鬧人」
有指杜琪峯在片場很嚴厲，令人不敢惹他，問他是否沒有後輩敢向他討教？杜琪峯笑說：「我一向係對事唔對人，我認為入得片場就要有專業態度，最討厭係冇背熟對白嘅演員，如果做幕後都冇盡自己崗位上的責任，我實鬧到佢七彩，不過就絕唔會無緣無故鬧人。」
此外，劉德華昨日接受新城訪問，談到是否接拍由爾冬陞和陳可辛執導、以荷李活片《毒網》為藍本的新戲時，他說：「我哋只係初步接觸，入面有好多個角色，好似有毒梟、癮君子、毒犯同警察等，每個角色都好特別，但就唔知佢重搵啲乜嘢人。不過我唔介意做癮君子，但一陣人哋又話我太瘦。𠵱家等佢哋再執劇本，之後再睇適唔適合做。」
「鄭秀文狀態好」
提到有指華仔在金像獎頒獎禮上漏口風，似暗示好拍檔鄭秀文患病，華仔認真地說：「你（記者）唔好咁啦！我意思係歌迷見到佢會好開心，冇話佢啲乜。我冇講到，好彩有錄影帶，以我所知佢健康好過我，皮膚靚過我。嗰日佢好好狀態，最初唔知佢坐我後面，我猛聽到佢呱呱笑又傾偈。」
採訪、攝影：王連連
