各位可知GuGe係乜？
就係「谷歌」，Google前日正式公布佢哋嘅官方中文名叫「谷歌」，跟住啲人又將呢兩個字譯番做英文，變成GuGe。真係睇到氣都谷埋。
「谷歌」呢個名，橫睇掂睇都唔係一個好嘅譯名，八方上Google搜尋吓呢兩個字，發覺毫無出處。官方話係「矽谷歌聲」咁解，但網民就媽到七彩，話不如叫「狗哥」，或者叫「狐狗」仲好啲。有人仲話強如Google，入到中國就乜創意都冇晒。
咁點先有創意呢？八方拋磚引玉，舉個例。今個禮拜一，法資大經紀百富勤開記者會分析股市前景，由佢哋位董事兼香港研究部主管MohanSingh主持，呢位哥哥睇完水晶球，估恒生指數可升上17490點，十分樂觀。佢冇官方中文名，如果要譯，譯做「無限升」，相信百富勤都唔會反對。
本版讀者高手林立，不如試吓幫Google譯個中文名，衣貓嚟比賽吓，等八方做評判，贏咗有小獎品一份。
傳真︰2623-9278
電郵︰[email protected]