政府今次堂而皇之話要檢討香港公共廣播事務，係人都知佢哋係「項莊舞劍，志在港台」。
唔係想郁港台，點解原來同屬乙項工程項目嘅添馬艦，就晉升甲級，要急住上馬？港台就跌咗落丙級，即係差唔多等於呢世都唔使旨意做啦。
八方最近仲收到一條勁料，話煲呔千方百計想陰乾港台，除咗要向北京交心之外，仲想迫港台喺財政資源緊張嘅劣勢下，自願交回兩個電台頻道，等佢位技癢咗好耐嘅老友鄭大班將來有咪可開。
八方問鄭大班有冇聽過呢個傳聞，但係搵佢唔到，原來佢同立法會資訊科技及廣播事務委員會嘅三人考察團（仲有卿姐同單仲偕），去咗加拿大渥太華，噚日就訪問咗加拿大電台電訊管理局，以及參觀咗加拿大廣播公司嘅設施，今日下晝考察團就啟程去美國華盛頓市，所以一切都要等大班返港先有得求證。
傳真︰2623-9278
電郵︰[email protected]