大部份市民均會透過傭工介紹公司聘請家傭。有讀者最近卻遇上「傭」不對辦情況，新聘傭人不符合要求，僱主卻礙於合約條款所限不能更換。其實，市民如想找到理想外傭，除可考慮付出較高介紹費，聘請曾在港工作外傭外，亦可自行刊登廣告或透過其他外傭推薦，面見具經驗外傭，直接了解對方是否符合要求。
讀者麥太一家三口，居於兩層獨立屋，一直有聘用外傭。她說：「其實我哋唔係餐餐喺屋企食飯，請個工人主要都係做家務。我之前都係用開得成介紹嘅海外外傭（即未曾在港工作外傭），因為我見佢成日賣廣告，話工人有培訓，又識講廣東話，上一個佢介紹嘅都冇問題，今次咪又搵番佢囉，點知出事！」
只受訓兩星期
麥太表示，新來印尼傭工甫到其家，她已感到不對勁。「我一接咗嗰工人返屋企，已發覺佢嘅基本英語能力好有問題，好似要佢校細煲湯個火，已經好簡單咁講咗三次，問清楚佢係咪明白，個印傭話OK我先走開，但最後都係唔識做；問佢點解唔用塊海綿清潔布抹車，佢就淨係識指住塊海綿話『dotdotdot』，原來佢想講dirty（骯髒）但係唔識講；煮個餐蛋麵，講明要煎蛋又變成蛋花，麵又煮到糊晒；最恐怖係第三日，佢直頭同我講做唔掂啲嘢！」
她不滿說：「又話工人起碼培訓三個月，但個印傭話佢只係受訓過兩個禮拜！𠵱家唔對辦又冇得換人。」
得成僱傭中心發言人指出，麥太是參與海外外傭計劃，合約已列明不能轉換本地外傭。她說：「個印傭英文唔錯，佢之前喺新加坡做過五年。培訓方面由當地代理負責，一般由一至三個月不等，但呢位印傭因為回鄉，失去聯絡，只夠時間受訓兩個禮拜，不過海外外傭來港只要求有兩年家傭經驗，但佢就有五年，所以培訓時間短啲都應該問題唔大。」
答應逐步改善
發言人指出，印尼外傭因教育程度低，普遍較為「單純」。她說：「佢哋常識可能唔足，又唔識主動去問啲嘢點做，需要長啲嘅適應期。而麥太接走個外傭第三日就投訴，公司已前後三次接見個印傭了解，佢都承認係有啲粗心大意，寫埋悔過書，應承逐步改善。就算客人一定要換，最好都等個新外傭接替到先炒舊嗰個，影響會細啲！」
檔案編號：0329013
蘋果投訴熱線：29290000
社會服務熱線：29908288
傳真：23702192
電郵：[email protected]