議員助理H可能係芸芸助理中，對西方最熟悉嘅一位，助理H留學/居住於倫敦十幾年，修讀古羅馬史，在香港學生中，算係冷門之中嘅冷門。但佢同時又讀列子、韓非子、孫子，想話寫篇博士論文，題目可能係「韓非子與馬基維利（Machiavelli）之權謀比較與歧異」。點知因為一時忘記了簽證時間，唔記得延期，英國移民官唔畀佢繼續留在英國，唯有返回香港。雖然家庭富裕，不憂衣食，都係要搵份工嘅啫，於是做咗議員助理。肥仔K熟讀三國演義，話助理H現在相等於龐統做緊芝麻綠豆官，未碰到張飛之時，他日遇上伯樂，隨時一飛沖天。
助理H安之若素，神色自若，每早到陸羽嘆杯靚茶，先至返工，佢細細個就跟阿爺上陸羽，冇理由大個仔之後，唔係陸羽常客嘅啫。一次左丁山約佢食飯，佢身穿三件頭深藍色間條西裝，戴帽，帶住把遮，比李國寶更英國打扮，十足涉嫌領綜援嗰位退休法官！講開又講，呢位退休法官仍然在陸羽飲茶，唔到你唔服！
照計如此英式之人，做議員助理唔會長久嘅，左丁山透過肥仔K向佢建議，不如入港大報讀番個博士，兩三年後交出篇博士論文，便以學者銜頭自居，對所有國際時事、經濟、中國政治、九鐵「兵變」、馬會博彩稅、民建聯講「有理有利有節」，以至最低工資、添馬艦、西九龍等等都評論一番，好快就會成為紅人，成為曾特首之座上客。其中竅妙就係留低手機號碼畀記者，永不熄機，記者一Call就立即評論，記者知道佢就手，隨Call隨有嘅話，佢嘅大名一定日日見報。再唔係就係搵三四個朋友組織一個東南九龍體育運動城關注小組，每個星期發表一篇新聞稿，反對政府之任何方案，話唔定政府搞「東南九龍發展諮詢委員會」之時，會預埋佢一份做委員。
可惜吖，助理H好似係竹林七賢之流嘅名士人物，私底下飲紅酒縱論古今中外就鍾意，企出嚟大大聲講就免談，暫時好難破窞而出也。