昨日大市急回，好多熱炒嘅股份都即刻腳軟，好似搞到小初心猿意馬的意馬國際（585），昨日一度回落至11元，收11.75元，跌8.92％。另外，日前話涉及資源業務，一度勁升的悅達（629），昨日亦跌15％，收1.30元。
不過，有部份走勢強勁的股份，就算跌市都擋佢唔住，好似經紀黃早排推介的北泰創業（2339），昨日又傳花旗調高其目標價至5.20元，隻股即時有反應，逆市勁升10％至4.125元，成交股數956萬股，金額3954萬元。
經紀黃話，北泰發展大陸市場被市場認同，所以大行調高目標價唔算意外。
管理層傳增持
據講北泰除咗發展大陸市場外，另有利好因素，話說北泰股權結構向來令投資者疑惑，皆因落手落腳嘅管理層，只持有好少股權，而大股東就唔多理公司，但家陣最新講法，就係行政總裁將逐步增持股權，增加投資者嘅信心。
慕容小初