美股跌，日股跌，港股跌埋。恒指成份股跌得最重嘅係恒隆地產（101），冇咗4.8%，但因屬細隻嘢，只係令恒指唔見9點。其次跌得重嘅係中移動（941），散1.65元，跌幅3.6%，恒指散165點，大約102點多得中移動。
中移動前日收45.70元，創01年7月以來新高（歷史新高係00年3月80.25元），9RSI上到85，事後孔明解釋昨日因超買而回落。
中移動C輪2256：中移動熱門C輪2117傷得好重，收19.3仙，下瀉29%，成交金額近半億。隻輪6月尾夠鐘，溢價6.5%，槓桿率22.8倍（有效10.3倍），引伸波幅30.4%。隻輪急跌後仍然係高危輪，事關溢價仍然唔低。2120又係6月尾夠鐘，溢價就着數過2117。
真係手痕，唔怕中移動超買，要買C輪，2256數據就靚過2117好多。揸2256，幾乎肯定好過揸2117。
中移動P輪4457：中移動下跌，P輪也文也武，不過最好咪亂嚟，啲P輪10%溢價，20%溢價，除非正股散得好厲害，否則揸落輸多過贏。真係手痕係都要賭，揀4457，現價12.1仙，不過正股如果冇變化，隻輪過多1陣就會成「仙」，11.9%溢價（3個半月命）點會守得住？
章盛