銀行競爭激烈，一眾賓卡唔單止對外要頻頻曝光，對內都要放下身段，不時搞嘢激勵吓員工士氣，好似滙豐咁，近日就出動六個高層嘅玉照，以電腦技術造咗張海報，向員工宣傳間行嘅「品牌價值」。
滙豐話，呢幾張poster係市場推廣部同事嘅傑作，呢兩日先至喺各大分行張貼，一共有七款，每個高層都有一個切合品牌價值嘅造型。
譬如要標榜dynamic（有衝勁及有動力），就將總裁邵銘高（後排中）個頭，key喺個美式足球員身上，另外仲有工商部一姐梁高美懿扮消防員（後排左）、王冬勝做醫生（前排中）嘅造型，唔單止趣怪，仲好有創意。唔知SirJohn係咪應該扮JamesBond？