陳凱歌執導嘅《無極》早前喺香港上映時，不論口碑同票房都好差，呢部戲其實喺內地上映時口碑亦麻麻，之後仲俾人改編成《一個饅頭的血案》喺網上播，嚟諷刺佢部戲，當時陳導演嬲到話要告人，但最近佢又改口話唔告啦！雖然套戲唔係咁好口碑，但內地票房就收過億人民幣，所以陳凱歌決定拍續集。
着重劇情發展
噚日有內地報道指陳凱歌日前已經去咗雲南拍廣告，順便為《無極2》睇景，佢主要會到香格里拉呢個地方睇吓啱唔啱拍，原來佢一向好鍾意香格里拉，至於劇本方面，聽聞唔會再好似第一集咁搞咁多特技魔幻嘢，講真陳凱歌呢方面又真係太差勁，可能佢都知呢方面係自己弱點，所以都唔敢再搞，寧願加強番喺劇情方面嘅發展，唔再以特技嚟取悅觀眾。
